Nola babestu kultur ondarea geroko belaunaldientzat? Zein eginkizun dagokio ondareari etorkizun jasangarriago eta erresilienteagoa eraikitzeko? Kultur ondare ukiezinaren jardunbideak eta adierazpenak errespetutsuagoak al dira naturarekin? Komunitateak, askotariko aniztasunak dituztenak, aktiboak al dira ondarea interpretatzen? Zein da emakumeen zeregina? Bultzatzen al da berezko egiteko moduak aintzat hartzen eta bertoko ekoizpena sustatzen dituen turismo-mota? Nola imajinatzen ditugu bizitoki izango ditugun etorkizuneko gizarteak?

Giza garapenaren funtsezko osagaia da kultura; izan ere, nortasun, berrikuntza eta sormen-iturria da pertsonentzat eta komunitatearentzat, eta alderdi garrantzitsua da ingurumen-arazoei konponbide jasangarria emateko, tokian tokitik ezagutza eta egiteko modu tradizionalen bidez. Ondarearen Europako aurtengo Jardunaldien gaiak hau aztertzera bultzatzen gaitu: zein urrats eman daitekeen gure kultura- eta natura-ondare joria eta askotarikoa babestu eta zaintzeko egungo testuinguruan, ingurumen-, gizarteeta ekonomia-erronkez beterikoan. Erronka horiei aurre egiteko asmoz, nazioarteko komunitateak 2030 Agenda onartu zuen 2015ean, eta ekintza-plan horren aburuz, jasangarritasuna da geroko belaunaldiek beren beharrak betetzeko ahalmena arriskuan jarri gabe oraingo beharrak betetzen dituen garapena.

Hortaz, Agendak mundu bidezkoagoa, jasangarriagoa, oparoagoa eta baketsuagoa eraikitzen lagundu nahi du. Eta, horretarako, Garapen Jasangarrirako 17 Helburuak (GJH) identifikatu ditu, zeinetan pertsonak eta Lurra erdigunean kokatzen diren, eta munduko kultura- eta natura-ondarea babestu eta zaintzeko gehiago ahalegindu behar garela onartzen du (11.4. GJHa).

Ondarearen Europako Jardunaldiak aukera paregabea dira kulturan eta ondarean diharduten gure profesionalek egungo eta geroko belaunadiek gure lurraldearen berezko ondare-baliabideez gozatzen dutela bermatze aldera egiten duten lana nabamentzeko. Hots, aukera ederra dira tokiko komunitateek, emakumeak bereziki aintzat hartuta, kultur ondare ukiezinaren jardunbideak eta adierazpenak birsortzen eta eskualdatzeari begira egiten duten lana agerian jartzeko. Hainbat jardueraren bitartez, naturaondarearen eta lurraldean bizitzeko eta bertoko paisaiekin harremanak izateko gure moduaren arteko loturak ulertuko ditugu.

Urrian kultur aniztasuna ospatuko duten jardueren partaide izatera gonbidatzen zaituztegu, baita gure ondarea geroko belaunaldiengana iritsiko dela bermatzeko konpromisoarekin bat egitera ere.

[INFO +]     ·     [Programa]