Durangoko Arte eta Historia Museoak eta Bizenta Mogel Bibliotekak elkarlanean antolatutako proposamen batekin gatoz. Oraingo honetan irudia eta hitza uztartzen dituen sormen tailer batekin. Txelu Angoitiaren gidaritzapean familia-albuma hartuko dugu aitzaki.

Sarritan pentsatzen dugu familia-albuma geure eta hurkoen oroimena gordetzen duten argazkien multzoa dela, ikustekoa baino ez den tresna bat. Baina ahaztu egiten zaigu beraren berezitasunetako bat dela askotan taldean ikusten dela, eta erritutik zerbait eduki ohi duten ikustaldi horietan beti dagoela kontatzaile bat, off ahots bat, bere hitzekin esperientzia osatzen duena.

Horrela, irudiak kontakizunaren aitzakia bihurtzen dira, eta norbaitek kontatzea izaten da beren izateko arrazoia. Narraziorako bokazio hori dela-eta, altxor bisual hori literaturatzat jo daiteke.

Albuma denboran zehar eraikiz doa, obra irekia da, eta une bakoitzean kontatzen duenari aldian aldiko gizarte-aurreiritziak, estereotipoak eta familia-harremanen islak eransten zaizkio.

Hauxe da tailer honen testuingurua: familia-albuma norberaren burua ezagutzeko eta oroimena gordetzeko bide gisa ez ezik, irudimena eta sormena hitzaren bidez garatzeko bitarteko gisa ere erabiltzea.